Skip to content
НАСА објави дека првиот прозорец за лансирање на Artemis II – првата мисија со екипаж во рамки на програмата за враќање на човекот кон Месечината – се отвора на 6 февруари 2026 година. Станува збор за тест-лет што треба да ги изведе четворицата астронаути на „кружна“ траса околу Месечината и назад, без слетување, како клучна проверка на системите пред идните мисии.
Паралелно со календарот за лансирање, НАСА ја придвижува и највидливата подготовка: ракетата SLS со капсулата Orion е планирано да започне со изнесување од зградата за склопување кон лансирната рампа 39B во Кенеди-центарот од 17 јануари, патување што може да трае до 12 часа и е условено од временски и технички фактори. По поставувањето на рампата следат финални тестови и таканаречена „влажна проба“ – полнење гориво и симулација на одбројување – по што тимот формално ќе ја оценува подготвеноста пред да „заклучи“ датум.
НАСА појаснува дека прозорците не се произволни, туку се резултат на строги орбитални ограничувања: треба да се обезбеди прецизна траекторија кон Месечината, „free return“ патека што ја користи гравитацијата за враќање, избегнување предолги периоди во сенка заради енергија и терморегулација, како и безбеден профил за влез назад во атмосферата. Во првиот период (31 јануари – 14 февруари) како можни денови се наведуваат 6, 7, 8, 10 и 11 февруари, а потоа следуваат дополнителни можности во март и почетокот на април.
Екипажот го предводи командантот Рид Вајсман, со Виктор Гловер како пилот, Кристина Кох и канадскиот астронаут Џереми Хансен како членови на екипата. Мисијата е планирана да трае околу 10 дена и е замислена како најсилен „стрес тест“ на Orion со луѓе во длабока вселена – животна поддршка, комуникации, навигација и оперативни процедури, вклучително и маневри што ќе ѝ требаат на НАСА кога ќе се стигне до посложени сценарија во идните фази на Artemis.
Овој распоред доаѓа по години одложувања и технички анализи по првата, беспилотна Artemis I мисија во 2022 година, кога се отворија прашања околу однесувањето на термичката заштита при враќање. Сега агенцијата се обидува да го „затвори кругот“ со лет што ќе ја врати човечката посада надвор од ниската Земјина орбита – нешто што не е направено од ерата на Аполо.
За следниот голем чекор, Artemis III, НАСА на својата официјална страница ја наведува како мисија „до 2028“, со цел прво слетување во регионот на јужниот пол на Месечината, што имплицира дека распоредот за слетување останува флексибилен и зависен од повеќе паралелни системи – од ракетата и капсулата до лендерот и скафандрите.