Skip to content
Агенцијата за аудио и аудиовизуелни медиумски услуги побара носителите на јавни функции да се однесуваат со почит кон новинарите и да ги почитуваат професионалните стандарди во комуникацијата со медиумите. Реакцијата дојде по однесувањето на гувернерот на Народната банка, Трајко Славески, за време на новинарско прашање поставено од новинар на ТВ Канал 5 на јавен настан наменет за медиумите.
Во соопштението, АВМУ наведува дека новинарските прашања се составен дел од демократскиот процес и дека не смеат да се третираат како напад. Агенцијата посочува и дека новинарите не смеат да бидат дискредитирани поради извршување на своите професионални обврски.
Според АВМУ, јавните функционери имаат обврска да покажат политичка култура, одговорност и професионалност, особено кога настапуваат пред медиумите. Во истиот став, Агенцијата апелира до функционерите да обезбедат услови за достоинствено, слободно и непречено извршување на новинарската работа.
Случајот претходно предизвика реакции и од новинарските организации. ЗНМ и ССНМ соопштија дека наместо одговор на директни прашања, новинарот од Канал 5 добил дисквалификации, откако Славески му порачал да разговара со својот уредник и да ги праша „кои се мотивите за овој напад врз централната банка“.