Skip to content
Претседателот на САД Џо Бајден повторно вети американска поддршка за Израел на денешната средба во Тел Авив со премиерот Бенјамин Нетанјаху.
– Сакав да бидам овде денеска од едноставна причина, сакам народот на Израел, луѓето во светот да го знаат ставот на САД. Сакав лично да дојдам и да го објаснам тоа, рече Бајден.
Американскиот претседател го осуди нападот на Хамас на 7 октомври врз Израел, велејќи дека групата „извршила зла, злосторства што прават ИСИС да изгледа малку порационално“, јави Си-Ен-Ен.
– Терористичката група Хамас масакрираше, како што беше посочено, над 1.300 луѓе и не е хипербола да се сугерира дека се масакрирани буквално – вклучително и 31 Американец — и тие зедоа голем број луѓе како заложници, вклучително и деца, потенцираше Бајден.
Сепак, тој истакна дека иако Израел има право да се брани, „ние исто така треба да имаме на ум дека Хамас не го претставува целиот палестински народ и на тој народ му донесе само страдање“.
Во Тел Авив, американскиот претседател Џо Бајден нагласи дека експлозијата во болницата Ал Ахли во Газа се чини дека била предизвикана од терористички групи во Газа, а не од Израел.
„Бев длабоко тажен и огорчен од експлозијата во болницата во Газа вчера. Врз основа на она што го видов, се чини дека тоа го направи другиот тим, а не вие“, истакна Бајден, јавно поддржувајќи ја израелската верзија за настаните. Сепак, американскиот претседател потенцираше дека голчем број луѓе не веруваат дека Израел не бил инволвиран во нападот, „па затоа треба да се надминат многу работи“.
Од своја страна, Нетанјаху му се заблагодари на Бајден на посетата, потенцирајќи дека тој е првиот американски претседател што го посетил Израел за време на војна.
– Тоа е длабоко, длабоко трогателно, зборува за длабочината на вашата лична посветеност на Израел, зборува за длабочината на вашата лична посветеност на иднината на еврејскиот народ и единствената еврејска држава, рече тој. – Знам дека зборувам во име на целиот народ на Израел кога ќе кажам благодарам, господине претседателе“.
