Skip to content
Петнаесет дронови се забележани над белгиската воена база Елсенборн во покраината Лиеж, потврди кабинетот на министерот за одбрана Тео Франкен. Според првичните информации, леталата биле уочени околу 1:45 часот по полноќ, при пробно тестирање на систем за детекција на дронови. Белгиската армија отвори истрага за потеклото и целта на летовите.
Базата Елсенборн, лоцирана на неколку километри од германската граница, служи како полигон за обука и вежби со огнено оружје и се простира на околу 28 км². Локалните извештаи наведуваат дека роjот дронови најверојатно полетал од територија на Белгија и продолжил кон Германија, каде бил забележан и од полицијата во градот Дирен. Засега не е познат операторот, ниту дали леталата биле опремени со камера/товар. Надлежните не соопштија да е забележана материјална штета или инцидент со персонал.
Инцидентот ќе биде разгледан и низ призма на воздушната безбедност и контрадрон-мерките, имајќи предвид дека воени полигони, железнички јазли и енергетска инфраструктура во ЕУ веќе извесен период се наоѓаат под засилен мониторинг. Белгиските власти апелираат граѓаните во регионот да пријават невообичаени летови, особено во ноќни часови и во близина на ограничени зони.