Би-Би-Си: Европскиот парламент утре го суспендира одобрувањето на трговскиот договор со САД

Одобрувањето на трговскиот договор меѓу Европската Унија и Соединетите Американски Држави, кој беше постигнат во јули, ќе биде суспендирано во Европскиот парламент, изјавија за Би-Би-Си извори блиски до Комитетот за меѓународна трговија на Европскиот парламент.

Одлуката за суспензија треба да биде објавена утре попладне во Стразбур.

Договорот меѓу американскиот претседател Доналд Трамп и претседателката на Европската комисија Урсула фон дер Лајен беше постигнат во јули на голф теренот на Трамп во Шкотска.

Со тој договор, кој се сметаше за добра зделка, американските царини за целиот увоз од Европската Унија беа намалени на 15 проценти, со оглед на тоа што Трамп претходно се закани дека ќе воведе царини за увоз од 30 проценти.

Сепак, договорот мора да биде одобрен од Европскиот парламент, а Комитетот за меѓународна трговија сè уште не ја завршил својата детална анализа.

Во саботата, само неколку часа откако претседателот Трамп се закани дека ќе воведе американски царини за Гренланд, влијателниот германски европратеник Манфред Вебер рече дека „одобрувањето не е можно во овој момент“.

Додека договорот беше во својата последна фаза, Европската Унија ги суспендираше своите контрамерки – царински давачки за стоки од САД во вредност од 93 милијарди евра.

Тоа суспензија истекува на 6 февруари, а без продолжување или парламентарно одобрување на договорот, царините на ЕУ за американски стоки ќе стапат на сила на 7 февруари.