Бил Гејтс по 34 години не е меѓу 10-те најбогати Американци

Бил Гејтс долго време беше еден од најбогатите луѓе во Америка. Почнувајќи од 1991 година, речиси три децении тој се наоѓаше на првото или второто место на листата на Forbes 400 најбогати луѓе во земјата.

Во 2021 година падна под второто место, а сега, првпат по 34 години, не е ни меѓу првите десет. На годинешната листа на Forbes 400 се наоѓа на 14-то место, веднаш зад коосновачот на Bloomberg LP, Mike Bloomberg, и едно место пред најбогатата жена во Америка и светот, наследничката на Walmart, Alice Walton.

Сепак, Gates и натаму располага со огромно богатство – Forbes ја проценува неговата имотна вредност на 107 милијарди долари, исто како и претходната година. Но, за разлика од другите милијардери кои стануваат сè побогати, Gates има поинакви планови.

Во мај најави дека планира да донира 99% од своето преостанато богатство на својата фондација Gates во следните дваесетина години. Фондацијата ќе ги затвори своите врати во 2045 година, кога Gates ќе наполни 90 години.

За да се ослободи од 99% од богатството, Gates планира секоја година да донира милијарди долари на фондацијата, при што сумите нема да бидат секоја година исти и ќе зависат од пазарните услови. Од лани, Gates донирал околу 7 милијарди долари на својата фондација.

Падот на листата започна по разводот со Melinda French Gates, неговата сопруга со која беше во брак 27 години. Во 2021 година падна на 4-то место со проценета вредност од 134 милијарди долари. Пред една година се најде на 9-то место, со имот вреден 107 милијарди долари. Дел од падот се должи на тоа што Melinda доби 12,5 милијарди долари како дел од разводот за сопствена филантропија, како и имот вреден 29 милијарди долари.

Gates, кој во октомври ќе наполни 70 години, постави големи цели за својата фондација. Еден од нив е ниту една мајка, бебе или дете да не умрат од причини кои можат да се спречат. Фондацијата ќе продолжи со напорите за искоренување на детската парализа и намалување на влијанието од маларија, како дел од пошироките активности за борба против заразни болести.

Со текот на времето, нето вредноста на Gates најверојатно ќе продолжи да се намалува, што ќе го турка сè подлабоко на листата на Forbes 400.