Блиц средба на Сиљановска-Давкова со американскиот претседател Трамп во Хаг: Остануваме посветени на сојузништвото со САД

Претседателката на државата Гордана Сиљановска-Давкова денеска имала кратка средба со американскиот претседател Доналд Трамп во Хаг, каде што се одржува Самитот на НАТО. 

-Кратка средба со американскиот претседател Доналд Трамп, симболичен гест на почит и партнерство.
Остануваме посветени на сојузништвото со САД како наш клучен стратешки партнер во рамките на НАТО и пошироко, напиша Сиљановска-Давкова на Фејсбук каде што се објавени и фотографии од средбата со Трамп на која присуствувал и шефот на дипломатијата Тимчо Муцунски. 

Претседателката Сиљановска-Давкова денеска се обрати на Состанокот на Северноатлантскиот совет, на Самитот во Хаг, каде што истакна дека „НАТО се соочува со бројни закани и за да се зачува мирот и безбедноста, потребна е колективна одбрана“.

Сиљановска-Давкова  на Самитот на НАТО во Хаг ја предводи македонската делегација во која се министрите за надворешни работи и надворешна трговија и за одбрана, Тимчо Муцунски и Владо Мисајловски, и началникот на Генералштабот на Армијата генерал-мајор Сашко Лафчиски.