Skip to content
Оваа недела претседателот на САД, Доналд Трамп, драматично го промени својот став кон Русија, воведувајќи ги првите директни санкции во неговиот втор мандат – остар пресврт за кој се вели дека е делумно резултат на влијанието на државниот секретар Марко Рубио.
Извори: Рубио ја откажа средбата со Лавров
Неофицијални извори за Блумберг изјавија дека Рубио ја откажал планираната средба во живо со рускиот министер за надворешни работи, Сергеј Лавров, откако разговарале по телефон и станало јасно дека Кремљ повторно се обидува да ги одложи мировните преговори и да ја продолжи војната.
Според американски и европски извори запознаени со ситуацијата, државниот секретар заклучил дека Москва не направила никакви значајни промени во својата позиција.
Влијанието на Рубио во промената на насоката на американската администрација ја одразува неговата поширока улога како врвен дипломат на Америка. Тој, исто така, се залага за поасертивен пристап кон Венецуела додека служи како привремен советник за национална безбедност.
Помирувачка стратегија на Виткоф
Неговиот став се разликува од попомирувачката стратегија кон Русија што ја застапува долгогодишниот пријател и специјален пратеник на Трамп, Стив Виткоф.
Портпаролката на Белата куќа, Ана Кели, го отфрли толкување за улогата на Рубио.
Кели: „Претседателот Трамп секогаш води во надворешната политика, а неговата агенда ја спроведуваат службеници за национална безбедност како што се секретарот Рубио и специјалниот пратеник Виткоф, кои дејствуваат како обединет тим зад визијата на претседателот „Америка на прво место“.
Блумберг забележува дека нема индикации дека Виткоф ја изгубил довербата на Трамп во однос на Русија или пошироко.
Некои извори тврдат дека разговорите на Виткоф со Путин и други високи руски претставници пред претходниот самит во Алјаска предизвикале конфузија и создале лажен впечаток дека Москва е подготвена да направи отстапки што никогаш не планирала да ги направи.
Путин инсистирал на преговори
Изворите додаваат дека самитот во август бил напнат бидејќи Путин инсистирал на преговори на украинска територија, што го фрустрирало Трамп и речиси го навело да го напушти состанокот. Овој пат, Рубио ги водеше прелиминарните преговори.
Стејт департментот претходно го опиша разговорот на Рубио со Лавров како „продуктивен“. Кога беше прашан за улогата на Рубио, портпаролот на одделот, Томи Пигот, рече дека „целиот тим е целосно обединет околу лидерството на претседателот Трамп“. Луѓето кои тврдат спротивното грешат, додаде тој.
Специјалниот претставник на Кремљ, Кирил Дмитриев, пристигна во Соединетите Држави на разговори кратко откако Трамп објави нови строги санкции против Русија.
