Skip to content
Министерката за енергетика Сања Божиновска на конференцијата „Јас сум жена“ ја изложи визијата државата да произведува доволно електрична енергија за сопствените потреби, со поголем дел од обновливи извори и со модерна, дигитализирана мрежа вклучена во европската енергетска архитектура. Во тој контекст, енергетската дипломатија треба да обезбеди заеднички инвестиции и проекти со соседите, рече таа на панелот „Жени во енергетиката“.
Божиновска оцени дека новото Министерство за енергетика е создадено заради потребата од фокусиран ресор што ќе ја координира транзицијата кон зелена економија и големите инфраструктурни зафати што следат. Таа ги посочи староста на дел од производните капацитети и мрежата, високата цена на реформите и потребата од предвидлива регулатива како клучни предизвици, паралелно со потребата од обучени кадри и „култура на одговорност“ во институциите и кај граѓаните.
Како тековни мерки, министерката ги наведе подготовките за нови фотоволтаични и ветерни проекти, модернизација на преносната и дистрибутивната мрежа со поддршка од меѓународни партнери, усвоени закони и стратегии што отвораат простор за приватни инвестиции, како и програми за енергетска ефикасност во домаќинствата и јавниот сектор. „Овие чекори покажуваат дека реформите не се само визија, туку реалност што веќе се случува“, рече Божиновска.
