Skip to content
Британскиот премиер Кир Стармер изјави дека Велика Британија треба да изгради поблиски и поамбициозни односи со Европска Унија, поради растечката глобална нестабилност предизвикана од војната со Иран. Според него, актуелната криза покажала дека земјата мора да ја зајакне соработката со европските партнери, особено во економијата и безбедноста.
Стармер нагласи дека последиците од конфликтот ќе се чувствуваат долгорочно и дека тоа е дополнителна причина за нов пристап кон односите со Европа. Тој најави и одржување на самит со ЕУ, на кој ќе се разговара за продлабочување на соработката и надминување на дел од последиците од Брегзит.
Иако повикува на поблиски врски, британскиот премиер истакна дека земјата нема да се врати во единствениот пазар или царинската унија, туку ќе бара нов модел на партнерство.
Во исто време, односите со САД се под притисок, особено по критиките од Доналд Трамп, кој се закани со повлекување од НАТО и го критикуваше британскиот пристап кон војната. Ова дополнително ја поттикнува Британија да се сврти кон Европа како клучен партнер.
Стармер потенцираше дека Велика Британија нема да се вклучи директно во конфликтот со Иран, туку ќе се фокусира на дипломатски решенија и стабилизирање на ситуацијата, особено кога станува збор за безбедноста на енергетските рути и глобалната економија.