Skip to content
British Airways ги суспендира летовите кон Дубаи, Доха и Тел Авив поради сериозната безбедносна состојба и нестабилноста на воздушниот простор на Блискиот Исток, предизвикана од ескалацијата на конфликтот во регионот. Авиокомпанијата соопшти дека привремено ги прекинува летовите кон неколку клучни дестинации додека внимателно ја следи безбедносната ситуација и препораките на надлежните институции.
Според информациите, британскиот авиопревозник ги откажал сите летови кон и од градовите Дубаи, Доха и Тел Авив најмалку до крајот на месецот. Дополнително, суспендирани се и летовите кон Амман и Бахреин, додека линиите кон Абу Даби се стопирани на подолг период.
Од компанијата наведуваат дека одлуката е донесена поради нестабилната безбедносна ситуација и честите напади со ракети и беспилотни летала во регионот, што го прави воздушниот простор ризичен за цивилниот авиосообраќај. Поради затворање или ограничување на воздушниот простор, бројни меѓународни авиокомпании беа принудени да ги откажат или пренасочат летовите кон Блискиот Исток.
Ситуацијата создаде сериозни нарушувања во глобалниот авиосообраќај. Голем дел од летовите меѓу Европа и Азија се пренасочуваат преку подолги маршрути, што доведува до зголемена потрошувачка на гориво, подолги патувања и дополнителни трошоци за авиокомпаниите. Во некои случаи, патниците остануваат заглавени на транзитни аеродроми или се принудени да бараат алтернативни летови.
Поради кризата, авиокомпанијата организираше и ограничен број специјални летови за евакуација на патници од регионот, особено преку Оман, каде што воздушниот простор остана отворен. Овие летови беа наменети за патници кои веќе имале резервации и сакале да се вратат во Европа.
Експертите предупредуваат дека нарушувањата во воздушниот сообраќај на Блискиот Исток може да продолжат сè додека трае воениот конфликт, бидејќи регионот претставува една од најважните воздушни рути што ги поврзуваат Европа, Азија и Африка.