Бугарскиот парламент ги одобри вонредните овластувања на администраторот за продажба на Лукоил

Бугарскиот парламент денес ги усвои измените на Законот за административно регулирање на економските активности поврзани со нафта и нафтени производи, со кои му се даваат вонредни овластувања на идниот специјален менаџер на компанијата Лукоил во таа земја, кој ќе може да ја продаде рафинеријата на компанијата во Бургас, објавуваат бугарските медиуми.

Проширените овластувања исто така значат дека, по назначувањето, специјалниот менаџер ќе преземе целосна контрола врз компанијата, додека акционерите и сопствениците ги губат своите овластувања, објавува Новине.

Менаџерот ќе може да располага со средствата на компанијата што излегуваат од опсегот на нормална комерцијална активност, но само по претходно одобрение од Министерскиот совет, додека трансакциите склучени со кршење на ова правило ќе се сметаат за ништовни.

Секоја продажба на акции или удел во компанијата ќе бара пазарна проценка, а преносот ќе се изврши само откако владата ќе го одобри купувачот.

Оваа одлука на кабинетот мора да добие претходно одобрение од Државната агенција за национална безбедност, а средствата од ваквите трансакции ќе бидат депонирани на посебна сметка кај Бугарската банка за развој (БРБ).

Според амандманите усвоени денес, министерот за финансии ќе има шест месеци да ги распредели примените износи во согласност со пренесените права.

Лидерот на владејачката ГЕРБ, Бојко Борисов, денеска изјави дека амандманите се координирани со Соединетите Американски Држави и дека тие имаат за цел да гарантираат дека по 21 ноември „ниту еден денар од Лукоил нема да оди за финансирање на војната во Украина“.

Според него, со промените, државата ќе преземе целосна контрола врз рафинеријата во Бургас, преку специјален администратор.

Назначувањето на специјален менаџер на Лукоил во Бугарија мора да се направи пред 21 ноември, кога стапуваат на сила санкциите на САД против руската компанија, воведени од Канцеларијата за контрола на странски средства (OFAC) на 22 октомври 2025 година.

Министерството за финансии на САД издаде привремена дозвола што им овозможува на компаниите да ги прекинат постојните трансакции со Лукоил до 21 ноември.