Бурата Ерминија ја погоди Атина, големи поплави и еден загинат

Невремето „Ерминија“ предизвика сериозни проблеми во Атина и поширокиот регион Атика, каде силен дожд, ветер и нагло зголемено количество вода поплавија улици, го отежнаа сообраќајот и доведоа до вонредни предупредувања од грчките служби. Во невремето загина едно лице во Неа Макри, откако било повлечено од надојдени води.

Грчката цивилна заштита претходно издаде црвен аларм за Атика и за уште неколку региони во земјата, со предупредување за силни врнежи, грмежи, можен град и засилен ветер. Во делови од главниот град имаше поплавени коловози, проблеми во движењето и интервенции на службите.

Преку бројот 112 беше испратено предупредување до жителите на Атика да ги ограничат движењата и да избегнуваат непотребни патувања додека трае невремето. Локалните медиуми јавија за прекини и отежнат сообраќај на повеќе точки, особено во деловите што беа погодени од најсилните врнежи.

Проблеми беа регистрирани и на Крит, каде силниот ветер и африканската прашина дополнително ја влошија состојбата. Во Иерапетра беше пријавено и торнадо, кое превртело камион.

Невремето „Ерминија“ ја зафати Грција на 1 и 2 април, а грчките метеоролошки служби најавија дека нестабилното време ќе се задржи и во текот на денот, со можни нови интензивни врнежи во делови од земјата.