Skip to content
На територијата на Македонија до утрово во 07:00 часот биле регистрирани вкупно 20 пожари на отворен простор, информира Центарот за управување со кризи (ЦУК). Од нив, четири се сè уште активни, еден е ставен под контрола, а дури 15 се целосно изгаснати.
Најкритични жаришта
Најсериозната состојба е во општините Зелениково и Липково, како и во Гази Баба и Гевгелија.
- Во селото Виниче, кај Гази Баба, огнот зафати нискостеблеста шума во реонот на Муратница.
- На Кожуф планина, кај гевгелиското село Петрово, се шири приземен пожар кој ја зафати лисната маса.
- Во Липковско, кај селото Никуштак, пламените јазици опфатија деградирана нискостеблеста и дабова шума.
- Најтешка е состојбата кај селото Вражале во Зелениково, каде што гори борова насадена површина.
Пожарот во Трубарево ставен под контрола
Еден од пожарите кој предизвикуваше голема опасност изминатите денови – во Трубарево, каде што гореше електричен отпад – е ставен под контрола. Во гаснењето беа вклучени противпожарни екипи и институции од централно и локално ниво.
Изгаснати 15 пожари низ земјата
Вкупно 15 пожари се изгаснати, меѓу кои и оние во урбани и рурални подрачја: од авто сервис на бул. „Борис Трајковски“ во Кисела Вода, па сè до депонии, стрништа и ниска вегетација низ повеќе региони. Пожари беа регистрирани и кај депонијата „Дрисла“ во Студеничани, на Царев врв во Кочани, како и во селата Ново Маала, Трновци, Мокриево, Свидовица, Иванковци, Горно Којнаре, Макреш, Идризово, Ласкарци, Визбегово, Алинци и на потегот меѓу селата Гермијан и Живојно во Битолско.
Надлежните институции апелираат граѓаните да бидат внимателни, бидејќи високите температури и сувата вегетација создаваат опасност од повторно разгорување на пожарите. Противпожарните екипи остануваат на терен за следење и брза интервенција.
