Целиот свет ја чека одлуката на Русија: Москва сака траен договор, секоја пауза во борбите би и дала шанса на Украина да се консолидира и реорганизира! 

Прашањето дали Москва ќе се согласи на едномесечен прекин на огнот останува неизвесно, бидејќи руското раководство постојано ја отфрлаше можноста за привремено примирје во последните недели и месеци. Наместо тоа, Кремљ инсистираше на долгорочен мировен договор кој, според него, ќе ги реши „основните причини“ на конфликтот, според анализата на Скај. 

За Русија, овие „основни причини“ се западната агресија и проширувањето на НАТО кон исток. Ставајќи го ова клучен услов за мир, Москва се обидува да обезбеди исполнување на нејзините безбедносни интереси во случај на конечен договор. Но, овој став, исто така, му помага на Кремљ да ја оправда својата инвазија на Украина. Русија продолжува да тврди дека нејзината воена интервенција била неопходна за заштита на населението што зборува руски во источна Украина, наведувајќи го како причина неуспехот да се имплементираат договорите од Минск. 

Според руско Министерство за одбрана договорите од 2014 и 2015 година беа обиди да се воспостави прекин на огнот меѓу Киев и проруските сепаратисти во Донбас, но Москва сега тврди дека на Украина не може да и се верува дека ќе се придржува до прекинот на огнот. Сепак, овој аргумент е во голема мера дел од пропагандната стратегија на Кремљ, кој се обидува да се прикаже себеси како жртва која води одбранбена војна. 

Зошто Русија претпочита постојан мировен договор наместо привремен прекин на огнот? 

Клучната причина зошто Кремљ претпочита постојан договор е моменталната ситуација на бојното поле – украинските сили се во дефанзива. Секоја пауза во борбите ќе и даде шанса на Украина да се консолидира и реорганизира, па се поставува прашањето – зошто Москва би се согласила на тоа? Руската цел е Киев да дојде на преговарачка маса во што е можно послаба позиција, за да се постигне договор исклучиво за условите на Кремљ. Но, проблемот за Владимир Путин е што тој сега мора да покаже доследност. 

Со цел да му се допадне на Доналд Трамп, Кремљ постојано се обидува да се прикаже како миротворец во последните месеци, обвинувајќи ја Украина за продолжување на војната. Овој наратив досега функционираше во негова корист, бидејќи Америка се повеќе се приклонува кон Русија. Но, сега ситуацијата нагло се менува – Киев одлучи да ја тестира Москва и да види дали навистина ќе се согласи на прекин на огнот или ќе испадне дека мировните изјави на Русија биле само тактика.