Skip to content
Средината на октомври цената на златото достигна 4.380 долари за унца, што претставува историски рекорд. Во изминатата година вредноста на златото порасна за повеќе од 55 отсто, главно поради геополитички тензии, инфлација, побарувачка од Азија и низа други фактори.
Покрај тоа што златото традиционално се смета за безбедна имовина во несигурни времиња, неговата цена ја движи стравот од инфлација и економска нестабилност, како и геополитичките тензии. Сето тоа доведе до големи набавки од страна на централните банки во најголемите економии, што дополнително го забрза растот на цената.
Очекуваното намалување на каматните стапки и слабеењето на американскиот долар го прават златото поатрактивно во споредба со другите видови имот, што ја зголемува и инвестицииската побарувачка. Аналитичарите предвидуваат дека цената на златото би можела да продолжи да расте доколку се влошат геополитичките тензии и инфлацијата.
Повеќето стручњаци очекуваат понатамошен раст на цената во следните години. Goldman Sachs на почетокот на октомври 2025 ја подигна прогнозата за цената на златото на 4.900 долари за унца за декември 2026 година, со оглед на очекуваните купувања од околу 80 тони злато во 2025 и 70 тони во 2026 година од страна на централните банки, особено Кина и Индија, со цел диверзификација на резервите.
Аналитичарите истакнуваат дека трендовите како слабеење на американскиот долар, геополитички тензии, трговски конфликти и растечката заинтересираност на малопродажните инвеститори за злато како заштита од инфлација, веројатно ќе продолжат да го поттикнуваат растот на цената. Сепак, предупредуваат дека долгорочниот пад на цената не е исклучен, иако врз основа на историските показатели тоа би се случило само при евентуално заситување на пазарот.
Според истражување на Светското златно здружение спроведено меѓу лидерите на централните банки, 95 отсто од испитаниците очекуваат раст на глобалните златни резерви оваа година, додека рекордни 43 отсто очекуваат зголемување на сопствените резерви. Ниту еден испитаник не предвидува намалување на резервите, и покрај рекордните цени.
Најголемите сопственици на златни резерви се Соединетите Американски Држави со 8.133 тони, Германија со 3.350 тони, Италија со 2.451 тон, а потоа следуваат Франција, Русија, Кина, Швајцарија, Јапонија, Индија и Холандија. Интересно е што и Меѓународниот монетарен фонд поседува големи златни резерви, вкупно 2.814 тони, стекнати при основањето на фондот и плаќањето на камати на кредити во злато.
