Д-р Обочки: Брзиот третман кај изгореници е потег што спасува живот

Лекувањето на тешки изгореници бара брза процена, координација и интервенција во првите часови, порача д-р Елизабета Обочки, пластичен и реконструктивен хирург на Универзитетската клиника за хируршки болести „Св. Наум Охридски“, на панел посветен на акутниот третман на изгореници во рамки на конференцијата за институционалните и клиничките аспекти по пожарот во Кочани. Таа нагласи дека токму брзиот момент и навремениот потег може да спасат живот.

Во своето излагање Обочки рече дека утрото на 16 март на Клиниката бил мобилизиран тим од пет пластични хирурзи и тројца специјализанти, а паралелно биле подготвени анестезиолозите, операционите сали, инструментарките, медицинските сестри и интензивната нега. Во рок од околу час и половина во установата биле примени 30 пациенти, при што 18 биле згрижени на интензивно лекување, а останатите на хируршки оддели.

Таа посочи дека кај повредените не станувало збор само за изгореници, туку и за дополнителни компликации, меѓу кои инхалациони повреди и интоксикации. Според нејзиното обраќање, кај пациентите на возраст од 17 до 47 години биле утврдени длабоки изгореници со зафатеност од 7 до 40 проценти од телесната површина, а кај дел од нив биле изведени и итни хируршки интервенции, вклучително и фасциотомија и ешаротомија.

Обочки истакна дека во третманот веднаш се вклучиле и трауматолози, неврохирурзи, радиолози, интернисти, офталмолог, пулмолог, токсиколог и психијатри. Таа се осврна и на поддршката од странски тимови и на префрлањето на најтешко повредените во специјализирани центри за изгореници во соседни и европски држави. Според нејзините зборови, во следните две недели Клиниката останала центар за лекување на уште 11 пациенти, а дел од третманот вклучувал и ензимски пристап, рана ексцизија и кожни трансплантати.

Во изјавата беше нагласена и улогата на редовните микробиолошки анализи и рехабилитацијата, со оценка дека токму координираниот третман овозможил дел од пациентите за еден месец да бидат пуштени на домашно лекување. Пораката од настапот на Обочки беше дека кај изгорениците не пресудува само стручноста, туку и брзината со која системот ќе се организира во првите критични часови.

Извор: Фокус.мк