Данска воведува „Ноќна стража“ за Трамп – токму како во Game of Thrones

Данската влада воспостави своеобразна „ноќна стража“ во Министерството за надворешни работи – не за да ги одбива Дивјаците како во серијата Game of Thrones, туку за да ги следи изјавите и потезите на Доналд Трамп додека Копенхаген спие.

Овој нов систем започнува секој ден во 17 часот по локално време, а секое утро во 7 часот се подготвува деталeн извештај кој се испраќа низ целата данска влада и релевантните институции, објави весникот Politiken.

Новата пракса доаѓа по спорот околу Гренланд

Работното место „ноќна стража“ е воведено по дипломатскиот судир помеѓу Копенхаген и Вашингтон оваа пролет, кога американскиот претседател се закани дека ќе ја преземе контролата врз арктичкото острово Гренланд.

Според Politiken, ова е само еден од начините на кои данската дипломатија и државниот апарат се приспособуваат на „новата реалност“ во втората администрација на Трамп. Извор од Министерството за надворешни работи за Guardian изјавил:
„Ситуацијата со Гренланд и временската разлика помеѓу Данска и САД беа клучни фактори за воведувањето на овој аранжман.“

Наместо секој поединечно – колективно следење

Наместо вработените да ги минуваат ноќите проверувајќи новости од САД, министерството одлучило да воспостави организиран систем кој ќе го следи секој чекор на Трамп.

„Американското сојузништво како што го знаевме – е мртво“

Јакоб Каарсбо, поранешен главен аналитичар во Данската воено-разузнавачка агенција, смета дека оваа промена ја разобличува новата политичка реалност:
„Идејата дека САД се најголем и најважен сојузник на Данска практично е мртва. Сојузите се градат врз заеднички вредности и заедничко разбирање на заканите. Трамп не ги дели ниту едните ниту другите со нас – а би рекол ни со повеќето Европејци.“