Skip to content
Американскиот претседател Доналд Трамп им наредил на командантите на специјалните сили да развијат план за инвазија на Гренланд, објави британскиот весник „Дејли меил“.
Според весникот, политичките „јастреби“ околу американскиот претседател, по успехот на Вашингтон во воената операција на 3 јануари во Венецуела, за време на која беа заробени претседателот Николас Мадуро и неговата сопруга, „сакаат брзо да дејствуваат за да го освојат островот пред Русија или Кина да преземат некаков потег“.
Во извештајот се вели дека Трамп ѝ наредил на Заедничката команда за специјални операции (JSOC) да развие план за инвазија, но дека Здружените началници на генералштабовите се спротивставиле на потегот, тврдејќи дека тој би бил нелегален и нема да има поддршка од Конгресот.
Во петокот, лидерите на политичките партии во Гренланд рекоа: „Не сакаме да бидеме Американци, не сакаме да бидеме Данци, сакаме да бидеме Гренландци“, по изјавите на Трамп во кои изрази интерес за преземање на Гренланд.
Зборувајќи на настан во Белата куќа во петокот, Трамп рече: „Ќе направиме нешто во врска со Гренланд, без разлика дали им се допаѓа или не, бидејќи ако не го сториме тоа, Русија или Кина ќе го преземат Гренланд, а ние нема да ги имаме Русија или Кина како соседи“.
Тој додаде: „Би сакал да го направиме тоа на лесен начин, но ако не го направиме тоа на лесен начин, ќе го направиме на потешкиот начин“.
Изјавите на Трамп предизвикаа осуда, а особено европските земји предупредија дека таков потег би можел да значи крај на НАТО.