Skip to content
Од 10 до 13 декември, Прилеп го одбележува јубилејното, десетто издание на меѓународниот фестивал на кратки филмови „Winter Apricots“. Она што пред една деценија започна како ентузијазам на мала група филмски заљубеници, денес е стабилна културна точка на македонската мапа.
Организаторот Дарко Горгиески вели дека десетте години зад себе носат истрајност, борба и стремеж за стабилност во средина со ограничени културни ресурси.
„Тоа за нас значи многу – мотивација, битка, истрајност. Како растеш, сакаш да припаднеш во некоја посигурна структура што ќе овозможи поддршка и долгорочно планирање. Ние се снаоѓаме, ја чуваме страста и истовремено го развиваме фестивалот“, вели Горгиески.
Ова издание е проширено на четири дена и ќе донесе околу 50 кратки филмови во три натпреварувачки селекции – балканска, интернационална и македонска – како и ревијалната програма реализирана во соработка со фестивалот на танцови филмови „Furi Formato“ од Џенова.
Покрај филмската програма, годинава фестивалот нуди и побогата придружна содржина: две промоции на книги, два концерти, изложба на фотографии и неколку тематски предавања за филмот.
Италијанката Елена Мелончели, која една година живее во Прилеп и е дел од организацијата, открива како е избрано необичното име на фестивалот.
„Нема ништо поблаго и поубаво од кајсијата – а кајсии на зима нема. Токму оттаму дојде идејата: нешто слатко и ретко, нешто што го посакуваш“, вели таа.
Мелончели додава дека прилепчани пред десет години речиси и не посетувале филмски проекции:
„На првите изданија имавме 30-40 луѓе во публиката, главно пријатели и роднини. Со години регрутиравме нова публика и денес имаме критична маса – не само од Прилеп, туку и од други градови.“
И покрај ограничената инфраструктура, „Winter Apricots“ успева секоја година да создаде нови простори и нови навики кај локалната публика, претворајќи го Прилеп во зимски дом на краткиот филм.
