Џихадисти во Мали јавно погубија тиктокерка – ја обвиниле дека соработува со војската

Млада тиктокерка од Мали беше киднапирана во четвртокот, а потоа јавно погубена следниот ден на северот на земјата од осомничени џихадисти, кои ја обвиниле дека соработува со малиската војска, соопштија членови на нејзиното семејство и локалните власти.

Жртвата, Маријам Сисе, била позната по видеата што ги споделувала на TikTok, во кои прикажувала сцени од својот роден град Тонки, во регионот Тимбукту на северот од Мали. Таа имала повеќе од 90.000 следбеници на платформата.

Нејзиното погубување предизвика огромно негодување во јавноста во земја која веќе со години се соочува со безбедносна и економска криза.

„Џихадистите ја уапсија во четвртокот, обвинувајќи ја дека ги информирала воените сили за нивните движења“, изјави нејзиниот брат за агенцијата AFP.
Следниот ден ја одвеле со мотор на Плоштадот на независноста во Тонки и ја застрелале пред граѓаните.

Локалните власти го потврдија убиството и го оценија како чин на варварство.

Мали се соочува со длабока безбедносна криза од 2012 година, предизвикана од насилството на џихадистички групи поврзани со Ал Каеда и Исламската држава, како и од криминални групи кои делуваат во некои локални заедници. Оваа криза дополнително ја влошува и тешката економска состојба во земјата.