Skip to content
Германската влада ѝ даде овластување на полицијата да оборува дронови што можат да претставуваат безбедносна закана. Но, новата политика отвора прашање — дали тоа би можело да ги загрози леталата што пренесуваат лекови и медицински материјали?
Проблемот се актуализираше откако на почетокот на месецот појава на неидентификувани дронови го блокираше аеродромот во Минхен, што ги натера властите да преземат построги мерки. Германскиот министер за внатрешни работи, Александер Добриндт, најави создавање на специјална полициска единица за одбрана од дронови, која ќе има право да ги соборува сите беспилотни летала што можат да предизвикаат ризик.
Но, не сите дронови се закана. Сè поголем број од нив се користат за цивилни цели, особено во логистиката и здравството.
„Каде што ние летаме, веќе нема алтернатива“, вели Норман Кершулте, основач на Morpheus Logistik, единствената германска компанија што врши транспорт со дронови. Тој објаснува дека нивните летала замениле класичен патен транспорт поради сообраќаен метеж и недостиг на капацитети.
Со помош на дронови, болници и лаборатории брзо и еколошки пренесуваат крв, вакцини и примероци, наместо да зависат од автомобили. Секој лет може да пренесе околу 250 лабораториски примероци, велат од Morpheus Logistik.
Од март годинава, дронови редовно летаат на 50 километри релација меѓу градовите Зелент и Бад Олдесло во северна Германија, во рамки на проект на болничката групација Asklepios. Досега се извршени повеќе од 100 транспортни мисии, со цел да се намали притисокот на патиштата и да се обезбеди побрз, поевтин и позелен транспорт на медицински материјали.
Нови правила за безбедно небо
Во Германија, сите дронови потешки од 250 грама или оние што летаат во чувствителни зони мора да имаат „дигитална регистарска табличка“ (EID). Само надлежните институции имаат пристап до овие податоци, за да се спречи злоупотреба или следење на операторите.
Недисплеј на EID може да се казни со глоба до 50.000 евра, а во потешки случаи — како загрозување на авионски сообраќај — затворска казна од шест месеци до десет години.
Со зголемената употреба на дронови, Германија се соочува со предизвик: како да ги разликува добрите од лошите летала — и како да обезбеди дека небото ќе остане безбедно и за полицијата, и за медицината.
