Skip to content
Додека Трамп го реже образованието, Меланија нуди АИ-визија за учениците преку нова технолошка порака од Белата куќа, испратена на самитот „Fostering the Future Together“, што се одржа на 25 март пред претставници од 45 земји. Во центарот на настанот беше идејата вештачката интелигенција да стане дел од наставата преку персонализирано учење и хуманоидни системи, во момент кога администрацијата на Доналд Трамп паралелно продолжува со кратење и префрлање на дел од функциите на Министерството за образование.
Во своето обраќање, Меланија Трамп ја претстави визијата за замислен хуманоиден едукатор наречен „Платон“, кој би бил постојано достапен за учениците, со можност да се приспособува на нивното темпо, ниво на знаење и емоционална состојба. На самитот беше претставен и роботот Figure 03, кој ги поздравил гостите на повеќе јазици, а целата порака беше насочена кон тоа дека иднината на образованието ќе мора да се потпира на дигитални и интелигентни алатки.
Но токму тука се отвора и најголемата противречност. Додека првата дама зборува за нова ера на учење, администрацијата на Трамп веќе подолго време ја стеснува улогата на федералниот образовен систем. По извршната наредба со која беше најавено враќање на образованието под поголема контрола на државите, дел од клучните функции почнаа да се префрлаат во други институции, а самиот ресор останува под постојан политички и административен притисок.
Така, пораката од Белата куќа не звучи само како технолошка визија, туку и како политичка замена за систем што постепено се празни. Наместо државата да покаже како ќе го зајакне образованието, на маса се става идејата дека АИ може да ја пополни празнината. Прашањето што останува е дали роботите ќе бидат дополнување на наставата или алиби за повлекување на институциите.