„Домаќинство за почетници“ ја доби 17. Queer Lion награда на фестивалот во Венеција

Годинешното 44. издание на Интернационалниот фестивал на филмска камера „Браќа Манаки“ што ќе се одржи од 23 до 29 септември во Битола ќе биде отворено со „Домаќинство за почетници“ на Столевски.

„Домаќинство за почетници“ во режија и по сценарио на Горан Столевски ја доби 17. Queer Lion награда во рамките на 80. издание на филмскиот фестивал во Венеција.

Филмот во продукција на Лист Продукција – Скопје е награден во конкуренција од 16 филмови, меѓу кои и филмовите „Dog Man“ на Лук Бесон и „Maestro“ на Бредли Купер.

Во објаснувањето за наградата стои дека: „Queer Lion со гордост го наградува филмот ‘Домаќинство за почетници’ во режија на Горан Столевски, за невообичаеното и храбро прикажување на етникумите, различностите, родовиот идентитет, љубовта, пријателството и емотивните афинитети“.

„Квир семејствата не се иднината; тие се сегашноста!“, изјави режисерот Столевски за извонредниот, трогателен и топол прием од публиката во Венеција по проекцијата на неговиот филм.

„Домаќинство за почетници“ пред два дена ја имаше светската премиера во Венеција, во рамките на натпреварувачката програма „Orizzonti“, а публиката во преполната сала „Дарсена“ со голем аплауз и долги стоечки овации ги награди режисерот Столевски и актерската екипа во филмот.

Годинешното 44. издание на Интернационалниот фестивал на филмска камера „Браќа Манаки“ ќе се одржи од 23 до 29 септември во Битола, а ќе биде отворено токму со „Домаќинство за почетници“ на Столевски.

17-тото издание Queer Lion Award, која е една од неколкуте дополнителни награди кои се доделуваат во склоп на филмскиот фестивал во Венеција од страна на здруженија на филмски критичари, клубови и културни здруженија и кино професионалци, ќе се одржи денеска во 19 часот. Наградата е иницирана во 2007 од страна на Даниел Н. Казагранде, новинар и филмски критичар, а со поддршка на Марко Милер, тогашниот директор на филмскиот фестивал во Венеција.

Дополнително, „Домаќинство за почетници“ доби и специјално признание од италијанската фондација Fondazione Fai Persona Lavoro Ambiente за социјално ангажиран филм. Во објаснувањето за ова признание стои: „Филмот е навистина извонреден бидејќи го истражува влијанието на различните слоеви на идентитет, како што се полот, етничката припадност, сексуалната ориентација и религијата преку интерсекциска призма“.