Skip to content
Министерот за економија и труд, Бесар Дурмиши, ја потпиша владината Одлука за законското усогласување на минималната плата, иако без согласност од синдикатите, со цел да се избегне блокада на исплатите во државата.
„Ако не ја потпишев Одлуката, ќе се предизвикаше блокада на сите институции и работодавачи. Законски, сумата мораше да биде утврдена до 31 март. Немаше согласност од синдикатите бидејќи им е истечена репрезентативноста. Постапивме според законот“, изјави Дурмиши.
Тој додаде дека веќе е формирана Комисија која ќе ја утврди репрезентативноста на синдикатите.
„Кога ќе се заврши оваа постапка, веднаш ќе го свикам Економско-социјалниот совет, каде што ќе се разгледаат аргументите за минималната плата“, рече министерот.
Дурмиши истакна дека секој има право на протест, но нагласи дека Економско-социјалниот совет е вистинското место за синдикалните барања.
„Ако се постигне поинаков договор, Владата е подготвена да го поддржи“, додаде тој, но избегна да одговори дали усогласувањето од 1.800 денари е доволно за достоинствен живот на работниците.
