Двајца уапсени за страшниот напад со нож во воз во Англија: Девет лица се борат за живот

Девет лица се здобиле со животно загрозувачки повреди по серија напади со нож во воз во близина на Кембриџ, во источна Англија. Полицијата уапси двајца мажи во врска со инцидентот, кој британскиот премиер Кир Стармер го нарече „страшен напад“.

Британската транспортна полиција соопшти дека антитерористичката единица ја поддржува истрагата, додека се утврдуваат сите околности и можниот мотив.

Полицијата потврди дека за време на интервенцијата била активирана шифрата „Платон“, национален код што го користат полициските и итните служби при реагирање на потенцијален терористички напад во движење. Оваа декларација подоцна била повлечена, а мотивот засега не е откриен.

Терминот „терористички напад во движење“ се користи за ситуации кога напаѓачи насумично напаѓаат повеќе цели на различни локации — често комбинирајќи напади со нож, огнено оружје, киднапирања на возила или експлозии.

„Спроведуваме итна истрага за да утврдиме што точно се случило. Можно е да помине извесно време пред да можеме да потврдиме повеќе информации. Во оваа рана фаза не би било соодветно да се шпекулира за причините на нападот“, изјави главниот инспектор на Британската транспортна полиција, Крис Кејси.