Skip to content
Свеченото отворање на „Есенските музички свечености“ 2025 ќе се одржи со концерт на Македонскиот национален џез оркестар, насловен „Македонски сновиденија“, под диригентската палка на Владимир Николов. Настапот е закажан за 25 октомври 2025 (сабота) со почеток во 20:00 часот, на сцената на Малата сала на Филхармонија. Билетите се достапни преку karti.com.mk.
Проектот „Македонски сновиденија“ претставува динамична фузија на македонскиот фолклор и современ џез, која ги истражува богатите културни корени на земјата преку јазикот на џезот. Оркестарот, под водство на Владимир Николов, ветува незаборавно музичко патување, исполнето со иновативни аранжмани и виртуозни солистички изведби.
Македонскиот национален џез оркестар, основан како национална институција во 2024 година, брзо се позиционира како водечка сила во македонската џез сцена. Биг бендот ги обединува врвните домашни џез музичари со меѓународно признати гости, меѓу кои се истакнуваат: Курт Елинг, Марија Мендеш, Дони МекКаслин, Курт Розенвинкел, Дон Менца, Шеун Кути, Зиги Фајгл, Луис Бониља и Франческо Беарцати. Тие сите придонесоа за растечкиот меѓународен профил на оркестарот и за неговата репутација како национален џез бренд со распродадени настапи.
