Skip to content
Европската комисија размислува за привремено одложување на спроведувањето на одредени делови од својот историски закон за вештачка интелигенција под интензивен притисок од големите технолошки компании и американската администрација, објавува „Фајненшл тајмс“.
Одлуката доаѓа по месеци жалби од технолошки гиганти како што се „Мета“ и „Алфабет“, во сопственост на „Гугл“, како и притисок од администрацијата на Трамп, која предупреди дека строгите мерки би можеле да предизвикаат трговски тензии.
Функционер на ЕУ, за „Фајненшл тајмс“ изјави дека ЕУ е „во контакт“ со американската администрација за прилагодување на Законот за вештачка интелигенција и другите дигитални регулативи, како дел од поширок процес на поедноставување, кој треба да се усвои на 19 ноември.
Во јули, портпаролот на Европската комисија ги отфрли повиците од некои компании и земји за одложување, велејќи дека правилата за вештачка интелигенција ќе бидат имплементирани според законскиот рок.
Дискусиите во рамките на комисијата сè уште се во тек во врска со можното одложување на „имплементацијата на одредени целни делови од Законот за вештачка интелигенција“, изјави портпаролот на ЕУ за Фајненшл тајмс. Тој додаде дека се разгледуваат различни опции, но дека ЕУ останува „целосно посветена на Законот за вештачка интелигенција и неговите цели“.
Закон за вештачка интелигенција
Законот на Европската унија за вештачка интелигенција има за цел да ги охрабри приватните и јавните актери да развиваат и прифаќаат безбедни и сигурни системи за вештачка интелигенција низ целиот единствен пазар на ЕУ.
Во исто време, се стреми да обезбеди почитување на основните права на граѓаните на ЕУ и да ги поттикне инвестициите и иновациите во областа на вештачката интелигенција во Европа.
Законот за вештачка интелигенција се однесува само на областите опфатени со правото на ЕУ и предвидува исклучоци во случај на системи што се користат исклучиво за воени и одбранбени цели, како и за истражувачки цели.
Според законот, различните форми на вештачка интелигенција се категоризираат според ризикот.
Според тоа, како што е наведено, системите за вештачка интелигенција кои претставуваат ограничен ризик би биле предмет на многу благи обврски во однос на транспарентноста, додека системите со висок ризик би биле одобрени под услов да исполнуваат голем број барања и обврски за пристап до пазарот на ЕУ.
Системите за вештачка интелигенција, како што се, на пример, когнитивната манипулација со однесувањето и социјалната евалуација, ќе бидат забранети во ЕУ поради неприфатлив ризик.
Законот, исто така, забранува употреба на вештачка интелигенција за предвидлива полициска обработка, која се базира на профилирање и системи кои користат биометриски податоци за категоризирање на луѓето според специфични категории како што се раса, религија или сексуална ориентација.
