Skip to content
Министрите за енергетика на земјите-членки на Европската унија го поддржаа предлогот за постепено укинување на увозот на руска нафта и гас до јануари 2028 година, со цел да се лиши Кремљ од приходите што ја финансираат војната во Украина, објави Советот на ЕУ.
На состанокот во Луксембург, министрите ги одобрија плановите што предвидуваат:
- раскинување на сите нови договори за увоз на руски гас од јануари 2026 година,
- укинување на постојните краткорочни договори од јуни 2026 година,
- и прекин на долгорочните договори до јануари 2028 година, пренесува Ројтерс.
Текстот на законот сè уште не е конечен, бидејќи ќе треба дополнително да се разгледа во Европскиот парламент, каде што се очекува усогласување на последните детали.
Во моментов, рускиот гас сочинува околу 12 проценти од вкупниот увоз на гас во ЕУ, што е значителен пад во споредба со 45 проценти пред руската инвазија врз Украина во 2022 година. И покрај тоа, Унгарија, Франција и Белгија сè уште увезуваат одредени количини на руски гас.
Новите предлози на Европската комисија се изготвени така што да добијат поддршка и од земјите што досега се противеле на ваквите мерки, пред сè Унгарија и Словачка, кои остануваат зависни од руска нафта.
Гласањето ќе бара поддршка од т.н. квалификувано мнозинство — односно најмалку 55 проценти од земјите-членки на ЕУ — што значи дека една или две држави нема да можат да го блокираат усвојувањето на предлогот.
