Skip to content
Европската комисија предложи укинување на царините за увоз на американски индустриски стоки како дел од трговскиот договор со Соединетите Американски Држави што треба да резултира со ретроактивно намалување на американските царини за европски автомобили.
Предлогот го означува првиот чекор на ЕУ во спроведувањето на договорот постигнат од американскиот претседател Доналд Трамп и претседателката на Европската комисија, Урсула фон дер Лајен, на 27 јули, со кој ЕУ прифати царина од 15 проценти на САД за да избегне трговска војна, објавува Ројтерс.
САД се согласија да ги намалат царините за автомобили произведени во ЕУ од 27,5 на 15 проценти на првиот ден од месецот во кој е презентиран предлог-законот на ЕУ, што значи дека треба да се применува ретроактивно од 1 август.
Предлогот за закон на ЕУ ќе треба да биде одобрен од мнозинството од 27-те членки на ЕУ и Европскиот парламент, што може да потрае со недели, но намалувањето на царините на САД за автомобили од ЕУ ќе се случи пред тоа.
Предлогот се состои од два закона, едниот за елиминирање на царините за индустриски стоки и обезбедување преференцијален пристап до американски морски плодови и одредени земјоделски производи, а другиот за продолжување на безцаринскиот увоз на јастог, кој сега вклучува и преработен јастог.
Спогодбата го заврши конфликтот меѓу двата најголеми трговски и инвестициски партнери во светот, иако е асиметричен договор, бидејќи Брисел се согласи да ги укине или намали своите царини за американски стоки и да купува американски енергетски производи неспоредливо повеќе отколку порано, додека Вашингтон ги задржа царините за 70 проценти од европските производи.
Просечната царина што ЕУ ја наплаќа за американските производи е 1,35 проценти, додека САД сега наплаќаат царина од 15 проценти за европските производи. Повеќето влади на ЕУ изјавија дека го прифаќаат договорот како „помало зло“, бидејќи Трамп претходно објави царини од 30 проценти за речиси сите увезени стоки од ЕУ.
Некои производи, вклучувајќи авиони, плута и генерички лекови, се ослободени од царината од 15 проценти, но челикот, алуминиумот и бакарот се наплаќаат со 50 проценти.