Skip to content
Индонезија и Европската Унија ги завршија преговорите за сеопфатен договор за економска соработка, по деветгодишни разговори, со цел зголемување на трговијата и инвестициите.
Спогодбата предвидува укинување на царините за 98,5 проценти од стоките од ЕУ што се извезуваат во Индонезија и поедноставување на процедурите за влез на европски производи, вклучувајќи автомобили и прехранбени производи како што се млеко во прав, сирења, месо, чоколадо и пекарски производи, соопшти Европската Унија.
Ова за ЕУ значи заштеда од 600 милиони евра годишно на царински давачки, кои во просек изнесуваат 10 проценти на извозот од ЕУ.
Индонезиските стоки ќе имаат нула царина за 90 проценти од пазарот на ЕУ откако договорот ќе стапи во сила, објави индонезиското Министерство за економија. Ова треба да го зголеми извозот на палмино масло, кафе, текстил, облека и други производи.
Координативниот министер за економски прашања на Индонезија, Ерланга Хартарто, рече дека целта е договорот да стапи во сила на 1 јануари 2027 година.
„Додека влегуваме во следната фаза – правен преглед, превод и ратификација – ја потврдуваме нашата решеност да го стапиме во сила овој договор што е можно поскоро“, рече Хартарто на церемонијата на потпишување на Бали.
Според индонезиските проценки, трговијата меѓу ЕУ и Индонезија би можела да се удвои во првите пет години од спроведувањето. Во 2024 година, трговската размена меѓу двете страни изнесуваше 30,1 милијарди долари.
„Со нетрпение очекуваме да создадеме синџир на снабдување меѓу Индонезија и Европа, вклучувајќи критични минерали, обновлива енергија, иновации, како и инвестиции“, рече Хартарто.
Тој на новинарите им изјави и дека Индонезија води преговори со европските производители на автомобили за партнерство во производството на батерии и електрични возила во таа земја.
Инвестиции на европски компании во Индонезија
Европскиот комесар за трговија, Марош Шефчовиќ, на Бали изјави дека договорот ќе ги охрабри инвестициите на европските компании во Индонезија и ќе помогне во диверзификацијата на синџирот на снабдување, особено за критични минерали што Индонезија ги има во изобилство.
Претседателката на Европската комисија, Урсула фон дер Лајен, во посебна изјава рече дека договорот ќе придонесе за обезбедување „стабилно и предвидливо снабдување со критични минерали, особено никел и кобалт“.
Претседателот на Индонезиското здружение на производители на палмино масло (GAPKI), Еди Мартоно, изјави дека договорот ќе ги отстрани царинските бариери за извоз во ЕУ, која е голем купувач на палмино масло.
Тој, сепак додаде дека нетарифните бариери, вклучително и Европската регулатива за уништување на шумите (EUDR), продолжуваат да бидат пречка за оваа индустрија.
Индонезија е најголемиот производител на палмино масло во светот, а EUDR бара од производителите да обезбедат документација што потврдува дека пратките не потекнуваат од области обезшумени по 2020 година.
„Сè уште има домашна задача, EUDR, која исто така мора итно да се реши, бидејќи ќе се спроведе подоцна оваа година“, рече Мартоно, додавајќи дека тоа би можело да го намали ефектот од трговскиот договор.
