Еуроактив: По победата на изборите Борисов има три можни опции

Новото 51-во Народно собрание на Бугарија ќе биде составено од рекордни девет партии, покажуваат резултатите по обработката на 98% од гласачките ливчиња.

ГЕРБ-СДС е во водство со 26.46% од гласовите, а веднаш зад неа е проевропската коалиција ПП-ДБ со 14.38%. Овие резултати навестуваат дека само коалиција помеѓу водечките партии нема да биде доволна за формирање влада, што значи дека лидерот на ГЕРБ, Бојко Борисов, ќе треба да добие поддршка од најмалку уште три партии, пренесува Еуроактив.

На трето место се најде проруската „Преродба“ со 13.65% поддршка. ДПС-Нов почеток, водена од Делјан Пеевски, освои 11.18%, додека Алијансата за права и слободи (АПС) на Ахмед Доган има 7.29%. Бугарската социјалистичка партија (БСП) се здоби со 7.62%.

Партијата „Има таков народ“ на Слави Трифонов доби 6.94%, а радикалната МЕЧ, предводена од Радостин Василев, 4.62%. „Величина“ исто така го премина изборниот праг со 4.04%.

Над 29% од гласачите поддржаа радикални и популистички формации. Борисов утрово им се заблагодари на гласачите и соопшти дека е подготвен за соработка со сите освен со „Преродба“.

Според Еуроактив, Борисов има три можни опции: да коалицира со ПП-ДБ, со Алијансата на Доган и дополнително да вклучи ИТН или БСП. За да обезбеди мнозинство, тој исто така може да соработува со независни пратеници доколку некоја од партиите како МЕЧ или Величина се соочи со проблеми.

Втората опција вклучува коалиција со Пеевски, заедно со ИТН и БСП, повторно со поддршка од независните. Третата опција е нестабилна влада со променлива поддршка.

Политичкиот аналитичар Парван Симеонов смета дека Борисов ќе бара начин да ги вклучи сите во коалицијата, за да го намали личниот ризик. Според него, ваквиот политички систем на Бугарија може да се соочи со големи промени доколку не успее да ги задоволи очекувањата на граѓаните.

Политикологот Даниел Смилов коментира дека ГЕРБ би сакале да избегнат коалиција со ПП-ДБ поради нивните барања за реформи во правосудството, но од друга страна, стравуваат од протестите и реакцијата на меѓународната заедница.