Skip to content
Она што почнало како божиќна случајност, денес е традиција што ја следи цел свет. Северноамериканската команда за воздухопловна одбрана (NORAD) и годинава ја активираше „дежурната“ мисија за следење на санките на Дедо Мраз – сервис што се вклучува секој Бадник и им дава на семејствата „локација во живо“ додека се делат подароци низ светот.
Легендата, како што ја прераскажуваат и медиумите и самата NORAD традиција, води до 1955 година: погрешно објавен телефонски број во реклама во Колорадо Спрингс довел деца да се јавуваат во воениот центар, а офицерот на должност – полковник Хари Шоуп – наместо да ги прекине, решил да „игра“ и да им кажува каде е Дедо Мраз. Од тогаш, приказната се повторува секој декември, а 2025 ја одбележува 70-годишнината од оваа необична „јавна услуга“.
Техничкиот дел од приказната денес звучи како пародија на сериозна воена операција: NORAD симболично објаснува дека го „фаќа“ полетувањето од Северниот Пол со радари, сателити и инфрацрвени сензори, а потоа повремено го „придружуваат“ и авиони. Во јавната комуникација се користи и препознатливиот хумор – дека сјајниот нос на Рудолф остава топлински „потпис“ што помага во следењето.
За граѓаните што сакаат практично да го следат патувањето, централното место е официјалната интерактивна мапа на NORAD Santa Tracker, која се активира на 24 декември и покажува движење во реално време. Во паралела постои и „жива“ комуникација преку телефонска линија и мобилни апликации, а NORAD традиционално се потпира на голем број волонтери што одговараат на повици и пораки. Дел од информациите што ги објавуваат медиумите посочуваат дека најинтензивниот прозорец е од раните утрински часови на 24 декември до раните часови на 25 декември (по MST), кога се собираат десетици илјади јавувања од стотици земји и територии.
Следете на овој линк: https://www.noradsanta.org/en/map