Европа доби Мапа на агросоларна политика: Извештајот открива каде соларните проекти се соочуваат со бирократски проблеми

Според извештајот, бирократијата и неконзистентните правила го попречуваат развојот на проектиите што комбинираат земјоделство и употреба на сончева енергија.

Европската унија се движи кон хармонизирање на агросоларните проекти, модел што овозможува двојна употреба на земјиштето за производство на храна и сончева енергија. Во овој контекст, организацијата SolarPower Europe објави нов извештај, Мапа на агросоларна политика, како сеопфатна алатка што ги споредува регулативите во 18 земји-членки на ЕУ. Мапата ги означува добрите практики, но и значајните регулаторни празнини што го забавуваат развојот на агросоларните решенија.

Како што е нагласено во извештајот, само пет од 18-те земји-членки опфатени со анализата имаат законска дефиниција за агросоларна енергија (Агро-ФВ). Покрај тоа, барањата за Проценка на влијанието врз животната средина (ОВЖС) значително се разликуваат меѓу земјите. Трет предизвик е што шемите за поддршка и правилата на Заедничката земјоделска политика (ЗЗП) не се усогласени, што го ограничува пристапот на земјоделците до финансирање.

Затоа, SolarPower Europe ја повикува Европската комисија да воведе единствена дефиниција за агросоларни системи на ниво на ЕУ и да им помогне на земјите-членки да ги хармонизираат националните регулативи.

Јасна дефиниција би го олеснила разбирањето на правната рамка за земјоделците, инвеститорите и администрациите, додека специфицирањето на критериумите во рамките на Заедничката земјоделска политика би им овозможило на повеќе земјоделци пристап до директни плаќања при користење на агросоларни технологии.

Извештајот предлага воведување на посебна еко-шема за агросоларна енергија во рамките на Заедничката земјоделска политика, т.е. годишни плаќања за земјоделците кои применуваат практики корисни за климата, биодиверзитетот и почвата.

Се препорачува и финансиска поддршка за иновативни проекти преку фондовите на ЕУ NextGeneration, Европската инвестициска банка и националните банки за развој, заедно со програма за гаранција за намалување на инвестицискиот ризик.