Skip to content
Членовите на Европскиот парламент (ЕП) од Комитетот за надворешни работи (АФЕТ) ја потврдија својата поддршка за европскиот пат на Србија и изразија солидарност со граѓаните, студентите и граѓанското општество, соопшти вечерва ЕП.
Делегацијата ја предводеше португалската европратеничка Марта Темидо и се сретна со претставници на владата, Народното собрание, владејачкото мнозинство, опозицијата, медиуми, академската заедница и студенти.
„Посетата на делегацијата е продолжение на резолуцијата на ЕП за Србија од 22 октомври 2025 година, со цел проценка на состојбата на демократијата, тековните протести и наводите за репресија насочена кон студенти, академици и јавни службеници“, се вели во соопштението.
ЕП нагласи дека пристапувањето кон Европската Унија е процес заснован на заслуги и почитување на демократијата, владеењето на правото, слободата на медиумите и независноста на судството.
Делегацијата ја истакна својата солидарност со граѓаните кои ги остваруваат своите демократски права и повика на одговорност и транспарентност на властите.
„Властите треба да обезбедат итни, непристрасни и транспарентни истраги за сите случаи на непропорционална употреба на сила и нелегално следење на демонстрантите. Слободата на собирање и безбедноста на новинарите и демонстрантите мора да се почитуваат“, се додава во соопштението.
Пратениците исто така изразија загриженост поради притисоците врз академскиот персонал, ограничувањата на слободата на медиумите и судските реформи кои би можеле да ја поткопаат независноста на судството. Делегацијата дискутираше и за интегритетот на изборите и спроведувањето на препораките на ОБСЕ и ОДИХР.