Skip to content
Последниот ден од 32. издание на Fashion Weekend Skopje, што од 27 до 29 март се одржа во „Дајмонд мол“, беше посветен на студентските колекции, дигиталните алатки во модата и на презентации што ја отворија темата за иднината на индустријата. Програмата ја отворија студентите од Интернационалниот институт за мода „Изет Цури“, со колекции на Рејхана Винца, Мирадије Селими и Дорунтина Каштанјева.
Во истиот ден беше одржан и јавниот разговор „3D и AI во модата“, во рамки на европската иницијатива Green DigiFashTechManager, проследен со изложба посветена на пресекот меѓу модниот дизајн, 3D технологијата и вештачката интелигенција. Во програмата беа вклучени текстилната инженерка и 3D модна дизајнерка Ангела Доневска со „Deep Within – Hologram Collection“, директорката на Семос Едукација Ангелина Канчевска и модниот дизајнер Никола Ефтимов со проектот „The Vein of Light“.
Посебен сегмент имаше и соработката со Академијата за графички дизајн, во која 17 студенти и алумни изработиле повеќе од 33 визуелни решенија за идентитетот на FWSK32 со користење AI алатки и дигитални медиуми. Официјалната насловна визуелизација е дело на Едита Зекировиќ, а делата беа прикажани како дел од програмата. Во рамки на денот беше претставен и европскиот проект Just Fashion, за кој зборуваше Даниела Милошеска од Bastet Noir, со фокус на одржливо производство, виртуелна кастомизација и дигитално прототипирање.
Во вториот дел од вечерта, програмата продолжи со ревијалниот дел. Факултетот за арт и дизајн при Европскиот универзитет – Скопје настапи со ревијата „Еклиптика“, по што следуваше групната ревија на Марија Станојовска и Маригoна Рахмани. Финалето му припадна на Олгица Ѓоргиева, која ја претстави колекцијата „Metamorfosis“, поддржана од Nera Caffe.
Завршницата на 32. издание вклучи и промоција на книгата „Облеката и модата, од историјата до денес“ од Зорка Тодорова-Младеновиќ. Со тоа, финалниот ден ја затвори програмата што оваа сезона ја постави модата не само како писта и ревија, туку и како поле во кое се среќаваат образованието, технологијата, авторството и културниот контекст.