Филипче: Барања на работниците се легитимни, кошничката ги јаде платите

Претседателот на СДСМ, Венко Филипче, оцени дека барањата на работниците за повисоки плати се легитимни, бидејќи „луѓето не можат крај со крај да врзат“, а синдикалната кошничка одамна ги надминува сегашните приходи. Тој ова го кажа во интервју за Радио Слободна Европа, во време кога синдикатите ја подигнаа реториката и притисокот кон Владата со протести и условувања.

Филипче ја врза платата со секојдневната сметка: значаен дел од месечните приходи оди за храна и пијалаци, струјата е поскапа, а комуналните трошоци растат, особено во општините каде што градоначалниците од ВМРО-ДПМНЕ носат одлуки што директно ја зголемуваат сметката на домаќинствата. Во тој контекст, порача дека Владата не може да „затвора очи“ и да ги игнорира реалните потреби на работниците.

Во истото интервју, лидерот на СДСМ потсети дека минималната плата, според неговите тврдења, пораснала од 150 на 400 евра во периодот на претходната влада, и дека бил поставен модел што би ја кренал и до 500 евра. Најави и дека СДСМ повторно ќе турка законско решение во Собранието, посочувајќи дека сличен предлог бил поднесен и во 2024 година, но бил одбиен од актуелното парламентарно мнозинство.