Skip to content
По години стагнација и „замрзнато“ градилиште во срцето на универзитетскиот кампус, Министерство за образование и наука го отвора процесот за довршување на двата недовршени објекти кај Ректоратот на УКИМ. Според планот што се вади од фиока, објектите ќе им се доделат за користење исклучиво на ФИНКИ, додека за факултетот за физичка култура/образование се најавува нов објект на неговата сегашна локација.
Највидливата промена е симболична, но и политички јасна: зградите нема да добијат барокни фасади, туку ќе се репроектираат со модерно решение и со естетика усогласена со кампусот. На тој начин, едно од најконтроверзните „наследства“ на претходните урбанистички политики во Скопје се обидува да се затвори тивко – не преку јавна расправа за тоа зошто проектот застана и колку чинеше застојот, туку преку нов проект што треба да ја „нормализира“ сликата на кампусот.
Координаторот на стручната анализа, Горан Марковски, според објавените информации, посочува дека решението предвидува функционални врски меѓу објектите и инфраструктурата: подземна поврзаност со паркинг и т.н. „топла врска“ за секојдневните потреби на факултетот. Паралелно, во претходно објавени планови се споменува и поврзување на двата објекта како единствен академски комплекс.