Финска ги укинува свастиките од авијациските знамиња за интеграција со НАТО

Финското Воено воздухопловство ќе ги повлече сините свастики од дел од знамињата на единиците – симбол што датура од 1918 година – за да избегне недоразбирања и непријатни ситуации со западните сојузници по приклучувањето во НАТО. Планот за обновување на знамињата е започнат во 2023 година и треба да ги усогласи симболите со „денешниот идентитет“ на родот, соопштија вооружените сили.

Иако официјално се нагласува дека иницијативата не е директно поврзана со НАТО, стручњаци велат дека интеграцијата со сојузниците – особено земји каде свастиката е строго негативен симбол – ја наметнала потребата за промена. На неколку (околу четири) авијациски единици сè уште им се вее старото знаме, а замената ќе се спроведува постепено.

Полковникот Томи Бём од крилото „Карелија“ изјави за јавниот сервис дека „можевме да продолжиме и со старото знаме, но со странски посетители понекогаш настануваат непријатности – мудро е да се живее со времето“, потврдувајќи дека учествувал во подготовките за промената.

Историјата зад симболот

Свастиката во финската авијација потекнува од 1918 година, кога Швеѓанецот гроф Ерик фон Розен го донира првиот воен авион со свој личен симбол – свастика во сина боја на бела позадина. Симболот се користел како национална ознака на авиони до 1945 година, а потоа останал на поединечни знамиња и одликувања; во поново време веќе е отстранет од амблемот на Воздухопловната команда.