ФТ: Како би изгледал нападот на островот што ја чува иранската нафта

Копнена инвазија на клучен ирански остров е сценарио што, според анализа на Фајненшл Тајмс, се разгледува во Вашингтон како можна опција за засилување на притисокот врз Техеран, ако кризата околу Ормутскиот теснец дополнително ескалира. Станува збор за островот Харк, преку кој минуваат околу 90 проценти од иранскиот извоз на нафта, што го прави не само воена, туку и економска цел од прв ред. Анализата сугерира дека евентуалното заземање на островот би ѝ дало на Америка силен адут за притисок врз Иран без веднаш да ја уништи самата нафтена инфраструктура.

Во текстот се опишува можен напад во кој американски сили би се приближиле до Харк со хеликоптери и десантни средства, а по слетувањето би се движеле блиску до нафтените постројки за да ја ограничат можноста Иран да отвори оган без да ја оштети сопствената клучна инфраструктура. Но, токму тука е и ризикот: островот има површина од околу 21 квадратен километар и се наоѓа на само дваесетина километри од иранскиот брег, што значи дека би бил под постојан дострел на ирански ракети, дронови и артилерија.

Според анализата, Пентагон веќе придвижува капацитети што би можеле да бидат дел од ваква операција. Меѓу нив се единици од 82. воздушнодесантна дивизија и две експедициски единици на маринците, со бродови како USS Tripoli и USS Boxer, опремени со летала V-22 Osprey, борбени авиони F-35 и десантни пловила. Во можниот прв бран би можеле да бидат вклучени и ренџери и специјални сили, со задача да ги освојат клучните точки пред пристигнувањето на главниот состав.

Но, и ако островот биде заземен, останува потешкото прашање: како да се задржи. Анализата предупредува дека приближувањето низ Ормутскиот теснец би било исклучително опасно поради можни мини, а секое подолго задржување би отворило ризик од поширока ескалација, вклучително и ирански напад врз сопствената нафтена инфраструктура или врз поморскиот сообраќај во Заливот. Така, Харк се појавува како симбол на една можна американска предност, но и како точка од која војната лесно би можела да влезе во уште понепредвидлива фаза.