Skip to content
Галатасарај – Јувентус 5-2 заврши драматичниот прв меч од плејофот за осминафинале во Лигата на шампионите, одигран вечерва, 17 февруари, на „Рамс Парк“ во Истанбул, каде турскиот шампион со четири гола во второто полувреме го разнесе италијанскиот тим и си отвори ширум врата пред реваншот во Торино.
Домашните поведоа во 15. минута кога Габриел Сара погоди со силен удар од далечина, но Јувентус одговори речиси веднаш: Теун Купмајнерс израмни во 16. минута, а потоа во 32. минута со уште еден прецизен удар го донесе гостинскиот тим до пресврт и водство 1-2 на паузата.
Рамнотежата се скрши веднаш по одморот. Ноа Ланг во 49. минута израмни на 2-2, а Давинсон Санчез во 60. минута ја сврте целосно сликата со гол по прекин за 3-2. Клучниот момент за распадот на Јувентус дојде во 67. минута, кога Хуан Кабал доби втор жолт картон и беше исклучен, оставајќи ги „бјанконерите“ со играч помалку во најлошиот можен период.
Со бројчана предност, Галатасарај ја претвори контролата во резултат. Ланг во 75. минута го постигна својот втор гол по асистенција на Виктор Осимен, а во 86. минута Саша Боeј ја заокружи „петардата“ по уште една акција во која Осимен беше во улога на креатор. Со 5-2, турскиот тим оди во реваншот на 25 февруари во Торино со голема предност и јасен психолошки плус, додека Јувентус ќе мора да бара „совршена“ вечер за да ја врати оваа разлика.