Skip to content
Северна Македонија има обврска да го почитува Преспанскиот договор, порачуваат од германското Министерство за надворешни работи, откако во неделата, новоизбраната претседателка на земјата Гордана Сиљановска-Давкова одби да го изговори уставното име на државата со придавката „Северна“, пренесе Дојче Веле на македонски.
Владата во Берлин сака да ја продолжи соработката со новата влада во Скопје, и смета дека е важно земјата да го продолжи патот кон ЕУ и да ги спроведе неопходните реформи на тој пат.
„Северна Македонија може да се потпре на Германија на тој пат“, изјави во понеделникот, портпаролот на германското МНР, Кристијан Вагнер. Но, што се однесува до користењето на името, Берлин бара да се почитуваа меѓународните договори.
„Што се однесува до користењето на името, постои меѓународен договор, Преспанскиот договор со Грција, на кој Северна Македонија е обврзана“, рече Вагнер.
На новинарско прашање, што ќе се случи доколку и новата влада во Скопје не го почитува Преспанскиот договор, Вагнер одби да шпекулира, но рече дека неговата влада останува на ставот дека Западниот Балкан припаѓа кон ЕУ.
