Skip to content
За претстојниот викенд и за деновите од наредната недела за вас избравме по едно дело од музиката, литертурата, театарот, телевизијата и филмот. Гледајте, слушајте, читајте…
Филм(ови): „Корсет“ на Мари Кројцер и „Вози ја мојата кола“ на Ријусуке Хамагучи
„Корсет“ (Corsage) е австриско-германско-луксембуршко-француска копродукција во режија и по сценбарио на Мари Кројцер (Marie Kreutzer) од 2022 година, со времетраење од 112 минути.
Во храбрата и субверзивна костимирана драма за царицата Елизабета од Австрија, општопозната како Сиси, која го слави својот 40-ти роденден и мора да се бори за да го одржи веќе стекнатиот јавен имиџ, стегајќи го телото сè повеќе и повеќе со корсетот. Улогата на царицата Сиси, спротивно на нејзините желби, е протоколарна. Сиси е идол на многумина заради нејзината убавина и е инспирација за модните трендови. Таа е на турнеја низ Европа и се обидува буквално и фигуративно да се ослободи од стегите во животот на царскиот двор.
Нејзината жед за живот и за нови знаења ја прават да биде сè повеќе и повеќе вознемирена во Виена. Се чувствува осамено, здодевно и старо, му се спротивставува на сопругот, царот Франц Јозеф, и се обидува да се скрие од јавноста наместо да носи превез на лицето, да се подложува на напорни физички вежби и да се опседнува со телесната тежина. Нејзината иднина се само церемонијални обврски, па Сиси се бунтува на ограничувањата на кралското семејство и на нереалната слика што светот ја има за неа.
Кројцер го менува имиџот на „сентименталната Сиси“, како што е претставена во безброј екранизации, и портретира жена што е многу повеќе од жртва на својот позлатен живот. КОРСЕТ е студија за гневот, Сиси на Кројцер има маани, нарцисоидна е и многу модерна, и се прашува што ќе ѝ остане кога моќта поврзана со нејзината убавина ќе исчезне.
Во главните глоги настапуваат Вики Крипс, Флоријан Тајхмајстер, Катарина Лоренц, Жан Вернер, Алма Хасун, Мануел Руби, Финеган Олдфилд (Vicky Krieps, Florian Teichtmeister, Katharina Lorenz, Jeanne Werner, Alma Hasun, Manuel Rubey, Finnegan Oldfield).
Во програмата „Извесен поглед“ на Канскиот филмски фестивал Вики Крипс ја освои наградата за најдобра улога, како и наградите за најдобра актерка на фестивалите во Сараево (БиХ), Сан Себастијан (Шпанија), Чикаго (САД), Европските филмски награди…
„Корсет“ е на програмата на Кинотеката на 11 март (сабота), 21:00 ч.; 16 март (четврток), 21:00 ч. и 18 март (сабота), 21:00 ч.
„Вози ја мојата кола“ (Doraibu mai kâ / Drive My Car) на Ријусуке Хамагучи (Ryusuke Hamaguchi), по сценарио на режисерот и Такамаса Ое (Ryusuke Hamaguchi, Takamasa Oe), е јапонска продукција работена според кратката приказна на глобалната книжевна ѕвезда Харуки Мураками.
Трогателен movie on the road за љубовта, за загубата, за прифаќањето и за мирот. Две години по неочекуваната смрт на сопругата, Јусуке, познат театарски актер и режисер, добива понуда да ја постави претставата „Вујко Вања“ од А.П. Чехов на театарски фестивал во Хирошима. По пристигнувањето во градот, театарската компанија му доделува возач бидејќи му е забрането да вози додека му трае договорот. Возачот е жена по име Мисаки и деновите со напнати проби се балансираат со долгите возења во автомобилот. Мистериозната и нерасположена Мисаки има свои мрачни тајни, и додека го вози низ градот заедно се соочуваат со болните вистини од минатото и наоѓаат нови начини да одат напред…
Во главните улоги настапуваат одличните актери Хидетоши Нишиџима, Токо Мијура, Реика Киришима, Парк Ју-рим, Џин Дае-јеон, Сониа Јуан (Hidetoshi Nishijima, Tōko Miura, Reika Kirishima, Park Yu-rim, Jin Dae-yeon, Sonia Yuan).
„Вози ја мојата кола“ освои Оскар за најдобар странски филм во 2022 г., „Златна палма“ за најдобро сценарио и на наградата ФИПРЕСЦИ на Канскиот филмски фестивал во 2021 г., а во портфолиото вкнижи уште 80-тина други награди на светските фестивали.
„Вози ја мојата кола“ е на програмата на Кинотеката на 13 март (понеделник), 21:00 ч.
Книга: Романот „Луѓето, а не градот“ на Снежана Младеновска Анѓелков
Најновиот роман на Младеновска Анѓелков е интимна исповест на скопјани за Скопје. „Се обидов да ги сочувам од заборав сеќавањата и спомените на последните скопјани, мои не лично доживеани, меѓутоа ги сметам за еден убав дел од периодот на животот на Скопје кога луѓето знаеле за соживот, за љубов и убави средби. И покрај бедата и сиромаштијата во која живееле, знаеле да живеат среќно!“, кажа авторката на неодамнешната промоција на нејзиниот роман.
Скопје, секако, е главната тема на романот Младеновска Анѓелков. Во нејзиниот „Музеј на сеќавања“ можат да се прочитаат најразлични приказни за маалскиот живот, реални животни приказни во текот на неколку децении.
„Луѓето, а не градот“ е слоевито, хибридно дело, одлично обмислена комбинација од реални животни приказни обликувани низ книжевно-раскажувачка визура, кои се движат низ хронотопот град Скопје во текот на неколку децении (Калина Малеска).
„Мемоари на урбофилија, полифонична хроника, архива на носталгијата, документарна проза, скопски сведоштва, прозно кроки на Скопје, колаж од сеќавања… сите овие одредници укажуваат на тоа дека од многуте документарни предлошки е искомбинирано нешто што легитимно се препознава како постмодерна проза“ (Соња Стојменска-Елзесер).
Младеновска Анѓелков (1977, Скопје) е дипломец на ФДУ, филмска и ТВ монтажа, и магистер по уметности – област филмска и ТВ монтажа. Нејзиниот прв роман „Единаесет жени“ (2011) ја доби наградата „Роман на годината“ на „Утрински весник“. Во 2014 година ја издаде филмско-есеистичката книга „Слики со животна уверливост“ посветена на филмовите на режисерот Владимир Блажевски.
Како автор е застапена во тематската збирка раскази „Тивка анестезија“ (2016, Антолог) и во антологиите „Best European Fiction 2017“ и „Contemporary Macedonian Fiction“ (2019) на Dalkey Archive Press. Нејзиниот втор роман „Молчи со отворена уста“ (2019) беше финалист на наградата „Роман на годината“ на Фондацијата „Славко Јаневски“.
„Луѓето, а не градот“ е издание на „Или-Или“.
Музика: Нора Џоунс
Родена во 1979 година, во Менхетен, САД, Нора Џоунс (Norah Jones) е ќерка на концертната продуцентка Сју Џоунс и прославениот бенгалски музичар Рави Шанкар. Своето детство и младост ги минува со мајка и во Грејпвајн, Тексас, каде што се образува. Најголемо влијание врз нејзиниот ран развој како музичарка имаат џезерите Бил Еванс и Били Холидеј, според кажувањата на Нора – музиката на Били Холидеј била постојано пуштена во нејзината соба.
Пред да започне со снимање на музика, Нора Џоунс настапувала како пејачка во клубови, а исто така настапувала со трип хоп бендот Вакс Поетик, блузерот Питер Малик и џез гитаристот Чарли Хантер.
Во 2000 година Нора, зпочнува со снимање на студиски материјали и на почеток ги создава New York First Sessions – студиски снимки кои претходат на нејзиниот деби албум од 2002 година кој ја лансира во елитата на светската поп и блуз сцена Come Away with Me. Нора Џоунс за овој албум е номинирана за 8 Греми награди, освојува пет.
Потоа следат албумите Feels like Home, Not Too Late, The Fall, Little Broken Hearts, Day Breaks и последниот Pick Me Up Off the Floor издаден во 2020 година.
Освен со музика Нора Џоунс има и солидна филмографска кариера, најзначајно одбележана со нејзината улога во филмот My Blueberry nights, каде настапува со Џад Лоу и Натали Портман,
Norah Jones – Come Away With Me https://www.youtube.com/watch?v=lbjZPFBD6JU
Norah Jones – Turn Me On https://www.youtube.com/watch?v=kwUtA8bUS30
Norah Jones – Don’t Know Why https://www.youtube.com/watch?v=tO4dxvguQDk
ТВ серија: „Три борови“ (Three Pines)
„Three Pines“ е мистериозна крими драма со исчезнување и убиства, со Алфред Молина во главната улога, заснована на серијата романи на Луиз Пени, во чиј фокус е главниот инспектор Арманд Гамаче.
Првата сезона беше премиерно прикажана на Amazon Prime Video во декември, 2022 година со четири мистерии за убиство, од кои секоја опфаќа две епизоди. Серијата до сега има вкупно осум епизоди.
Насловот на серијата „Три борови“, всушност, е името на едно идилично село во Квебек, Канада, каде што се случуваат мистериозните убиства кои ги инспирираат детективите да спроведуваат необични истраги. Во навидум мирното, и со раскошна природа опколено село, главниот инспектор Арманд Гамаш открива одамна закопани тајни и се соочува со сопствените демони.
Практично, тој гледа работи што другите не ги гледаат, или како што е напишано во описот на серијата – гледа светлина меѓу пукнатините, митско во секојдневието и злото кое само што не се појавило. За разлика од книгите врз чија основа е снимена оваа крими драма, серијата вклучува уште една приказна покрај мистериозните убиства, приказна која се провлекува низ сите епизоди од сезоната – потрага по девојката која исчезнала од дома под неразјаснети околности.
Во еден од многуте коментари на интернет еден гледач напишал дека „Три борови“ е најдобрата серија што ја изгледал во последните месеци и тоа го мисли не затоа што е пијан, туку затоа што е пребирлив во изборот каква серија ќе гледа за викенд.
Режијата е потпишана од Семјуел Донован, Трејси Дир и Дениел Гроу (Samuel Donovan, Tracey Deer, Daniel Grou), а во главните улоги настапуваат Молина, Росиф Сатрленд и Ел-Маја Теилфитерс (Alfred Molina, Rossif Sutherland, Elle-Máijá Tailfeathers).
Серијата ќе ја изгледате во еден здив или за еден викенд.
Избрале: С.С., В.Л., Љ.А.
