Skip to content
Катастрофалните поплави погодија милиони луѓе во Тајланд, Индонезија и Малезија, а најмалку 33 лица загинаа во масовните поплави во јужен Тајланд, објави денес весникот „Бангкок пост“, повикувајќи се на владата.
Повеќе од 2,5 милиони луѓе се загрозени од поплави само во Тајланд, кои следеа по обилните дождови, додава весникот.
Големите врнежи и поплави предизвикаа штети и во соседните земји.
Во Виетнам бројот на жртви се зголеми на 98 за една недела, додека во Малезија повеќе од 19.000 луѓе беа принудени да ги напуштат своите домови.
Според универзитетскиот професор и експерт за климатски промени, Сери Супратид, може да поминат неколку недели пред поплавните води да се повлечат од особено погодениот округ Хат Јаи на границата со Малезија.
„Луѓето се заробени на покривите, возилата се поплавени, а ранливите групи молат за помош“, изјави Супратид за „Бангкок пост“. На многу места, екипите за итни случаи можеа да се движат само со чамци. Владата нареди распоредување хеликоптери за доставување храна и помош до семејствата заробени во своите домови во силно поплавените подрачја.
Преку границата во Малезија, речиси 10.000 луѓе мораа да побараат засолниште во привремен сместувачки капацитет во државата Келантан. На индонезискиот остров Суматра, илјадници луѓе останаа без покрив над главата откако деновите обилни дождови предизвикаа поплави и лизгање на земјиштето.
