Росоклија за грантот од Епштајн: Имавме согласности и одобрување од семејствата

Горазд Росоклија за грантот зборуваше во изјава за Топ Тема на Телма, тврдејќи дека проектот и ткивата користени во истражувањето биле покриени со сите потребни етички одобренија и писмени согласности од семејствата, а воедно изнесе и свое претпоставување дека писмото до Џефри Епштајн било насочено кон обезбедување средства за научна работа.

Професорот Горазд Росоклија, специјалист по неврологија, невропатологија и психијатрија, во изјавата ја нагласува институционалната процедура околу грантовите и употребата на ткиво во научни цели. Според него, за грантот за кој станува збор, како и за другите грантови поврзани со Македонија, биле обезбедени согласности од етичките тела на Медицинскиот факултет, а по 2006 година, кога тој станал академик, и од етичкиот комитет на МАНУ, како и од Колумбија, при што тврди дека за секое користено ткиво постоел писмен консент од семејството, вклучително и за интервју и за користење на ткивото.

Интегрален текст на изјавата, дадена за Топ Тема, Телма:

„Тој грант како и сите други грантови со Македонија (мислам 6 или 7) ги имаат сите согласности од етичките комитети на Медицинскиот факултет, после 2006 година кога станав академик и на етичкиот комитет на МАНУ, како и на Колумбија и за секое ткиво кое е користено има писмен консент од семејството за интервју и за користење на ткивото.“

„Претпоставувам дека тоа писмо му испратено на Епштајн со цел да му се прикаже научното работење на одделот и да му побараат средства за финансирање на науката а професорот Дума преку тој проект им ги отвори вратите на научниот свет на своите вработени, што во македонски услови и за македонскиот менталитет бил огромен чекор.“

„За оваа соработка, Дума, јас и колега од Колумбија објавивме научен труд во Прилози (часописот на МАНУ), објаснувајќи го целиот проект во детали.“

Во делот за писмото упатено до Епштајн, Росоклија јасно го формулира ставот како претпоставка и го поврзува со идејата за претставување на научната работа и обезбедување финансиска поддршка. Во истиот контекст, тој ја истакнува улогата на професорот Дума во меѓународната видливост на одделот и тврди дека соработката била документирана и во научен труд објавен во „Прилози“, списанието на МАНУ, каде што, според него, проектот е опишан во детали.