Skip to content
Попладневниот пожар кој избувна на дивата депонија на Вардариште, пренесе најверојатно отровен чад судејќи по неговата густина и темно црната боја која обично е одлика на запалени гуми, низ низинскиот дел на источно Скопје токму каде што се населбите Ново Лисиче, Долно Лисиче и Аеродром.
Редакцијата на Рацин.мк разговараше со граѓаните кои уверуваат дека квалитетот на воздухот во овој регион на Скопје е едноставно неподнослив и мириса на изгорена пластика и дека „пече во градите“.
Марина Михајловска жителка на Ново Лисиче вели: „Од попладневните часови се ширеше неподнослива миризба, јас имам две мали деца, едното кива, другото почна да покажува знаци на асматично гушење, благодарение на совет од матичен лекар им даваме млеко и благи медикаменти за да ги смириме реакциите, во моментов дома седиме со затворени врати и со вклучен прочистувач на воздух“
Славица Трајковска од Аеродром (пензионерка) ни изјави дека покрај непријатниот мирис, има и доза на чад но и иритација на очите.
Граѓаните сосема оправдано ги поставуваат прашањата до кога една од најголемите скопски општини освен што се гужи во зимските месеци, ќе живее на работ на законските норми и правата за чист воздух и животна средина.
Потсетуваме дека граѓаните на овие општини но и во Трубарево, Маџари и Хиподром се без електрична енергија, бидејќи Електростопанство чека сигнал од противпожарна Скопје за вклучување етапно на струјата во овие региони.
