Грција се подготвува за големи предизвици, нема доволно вода: Властите презентираа план од 5 точки

Грчкиот премиер Киријакос Мицотакис презентираше план за решавање на сè поизразениот проблем со недостигот на вода во земјата.

Националниот план се осврнува на итната потреба од реформи за подготовка на Грција за големите предизвици во следните 30 години.

Мицотакис нагласи дека водата е јавно добро и ќе остане ресурс од витално значење, затоа треба да се третира како таква.

За време на состанокот беа презентирани детални научни податоци кои го покажуваат обемот на проблемите што ги предизвикува климатската криза во сите медитерански земји, имајќи предвид дека Европа е континентот што најбрзо се затоплува.

Според овие податоци, Грција е на 19-то место во светот по ризик од недостиг на вода. Нивото на водата во браните е на историски ниско ниво, а резервите во Атика се за повеќе од 50 проценти пониски отколку во 2022 година.

Затоа, Грција планира да примени холистички пристап, за разлика од сегашната фрагментација меѓу различните актери. Властите ќе спроведат радикални промени во начинот на управување со водата во земјата, преминувајќи кон пофункционален систем со поголема ефикасност и поголеми инвестиции.

Ќе се користат нови технологии, како и комплементарни начини за добивање вода, како што е десалинизацијата.

Претставени се петте главни столба на овој план:

Водата е и ќе остане јавно добро, во согласност со Уставот и јуриспруденцијата на Државниот совет
Одржливо водоснабдување, наводнување и третман на отпадни води, со прифатливи трошоци за сите намени
Холистичко планирање и централизирано управување со сите потребни проекти, големи и мали
Итни иницијативи во следните шест месеци, заедно со информативна и едукативна кампања
Нови технологии и дополнителни методи на производство на вода (десалинизација, рециклирање и повторна употреба)
Како што е наведено, ќе се постават темелите за имплементација на проекти што веќе се во тек или се разгледуваат. Моментално, се работи на повеќе од 1.200 проекти за управување и реставрација на водните ресурси, од кои 1.090 се однесуваат на водоснабдување, а 237 на наводнување.