Грците втори најсиромашни во Европа, зад нив се само Бугарите

Грчкиот народ сега официјално е втор најсиромашен во Европа. Реалните плати постојано паѓаа во 2022 година, според најновите податоци на Организацијата за економска соработка и развој (ОЕЦД), намалувајќи се за 30 отсто во однос на нивото пред кризата, пренесува „Грик рипорте

Грчката влада се пофали со економскиот раст на Грција, кој е повисок од просекот во еврозоната. Сепак, грчките граѓани остануваат на „дното на Европа“ во однос на реалната куповна моќ. И покрај тековното економско закрепнување, Грците стануваат посиромашни. Ситуацијата може да се влоши со текот на времето. Во моментов Грција често се споредува со Бугарија според куповната моќ.

– Додека подемот на грчката економија малку го зголеми животниот стандард во споредба со просекот на Европската Унија, ова подобрување е минимално. Таа не ја подигна Грција од позицијата на најсиромашна земја во еврозоната – пишува „Грик рипортер“.

Вреди да се напомене дека до 2009 година, грчкиот БДП по жител беше блиску до просекот на ЕУ. Сепак, оттогаш 10 земји ја надминаа Грција по животниот стандард. Сега, грчкиот народ е рангиран како втор најсиромашен во Европа, само пред Бугарија.

Сегашната состојба е последица од финансиската криза и штедењето што следуваше. Грција беше принудена да ги намали трошоците и да ги зголеми даноците за да обезбеди спас преку мерките на Меѓународниот монетарен фонд (ММФ) и ЕУ. Овие мерки ги „задушија“ бизнисите и домаќинствата, колабирајќи ја економијата. Како резултат на тоа, грчката економија сè уште е за околу 19 отсто помала отколку што беше во 2007 година. Во меѓувреме, економијата на ЕУ порасна за 17 отсто за тоа време.