Хамас почна со јавни егзекуции, толку ли од мирот?

Видеа со јавни егзекуции, за кои се тврди дека ги извршиле вооружени припадници на Хамас врз Палестинци обвинети за „соработка“, кружат на социјалните мрежи и додаваат нов слој неизвесност врз планот на американскиот претседател Доналд Трамп за стабилизација на Газа. АСП пренесува дека извор од Хамас ја потврдил автентичноста на едно од видеата, а паралелно се појавија извештаи за општа мобилизација на безбедносните сили на Хамас за „враќање на редот“ во делови од енклавата. Истовремено, Израел обвини за прекршување на прекинот на огнот и сигнализираше за „последици“.

Новиот наплив на насилство се случува веднаш по првата фаза од планот на Трамп – ослободување заложници, размена на затвореници и пауза на огнот – која беше оценета како делумен успех. Но следната фаза останува нејасна: расклопување на инфраструктурата на Хамас, формирање механизам за управување со Газа и можен мандат и состав на мултинационална стабилизациска мисија. Анализите на CNN, забележуваат дека претседателот Трамп го напушти регионот со истите отворени прашања со кои и пристигна, без детален распоред или параметри за „ден по утре“.

Според Times of Izrael на терен се пријавуваат судири меѓу Хамас и ривалски фракции, како и распоредување на милитантите покрај трасите за хуманитарна помош. Дел од жителите изјавиле дека „бегаат од сопствениот народ“, додека израелските власти тврдат дека организацијата не ги почитува обврските околу враќањето на телата на починатите заложници. ОН и МКЦК бараат итно отворање на сите гранични премини за да се забрза дотурот на помош.

Во овој контекст, политичката архитектура на планот на Трамп останува во воздух: кој ќе управува со енклавата во преодниот период, како ќе изгледа командната структура на евентуалната меѓународна мисија, и каква улога би имале реформата на Палестинската самоуправа и поширокиот регионален формат (Египет, Јордан, заливските држави). Големиот самит во Шарм ел Шеик демонстрираше дипломатски импулс и координација, но остави зад себе неразјаснети технички детали и политички „сиви зони“.

Додека трае прекинот на огнот и логистиката на размените, теренските сигнали од Газа – од внатрешна репресија до блокади и контра-обвинувања – ја отежнуваат втората фаза од процесот. Повеќето прашања што се клучни за одржливост на планот – безбедносни правила, управување, верификација и хуманитарни коридори – засега остануваат без прецизни одговори.