Skip to content
Кандидатот за градоначалник на СДСМ во Крушево, Томе Христоски, на средбата со жителите на селото Јакреново порача дека општината мора да продолжи по патот на развојот и дека „секој жител заслужува подобри услови за живот“. На настанот, организиран во рамки на предизборните средби, Христоски потенцираше дека во изминатите осум години се реализирани бројни инфраструктурни и комунални проекти и дека локалната власт „реално го сменила изгледот на Крушево и населените места“.
„Токму тука, во Јакреново, се чувствува промената. Во изминатиот период суштински се спуштивме меѓу месното население и во секое место ги решававме проблемите на нашите сограѓани. Ние сме тие што го градиме Крушево и што го менуваме секој ден, затоа што граѓаните тоа го заслужуваат. Но имаме уште работа – да го довршиме започнатото и да направиме ново,“ изјави Христоски пред присутните.
Тој најави дека, освен завршувањето на тековните проекти, во секое населено место ќе се реализира по еден нов капитален проект кој директно ќе одговори на потребите на жителите. Како приоритети ги наведе водоснабдувањето, реконструкцијата на училишта, изградбата на нови водоводи и канализации и подобрувањето на пристапните патишта. „Ние не се служиме со празни зборови, туку со конкретни дела и решенија што доаѓаат од терен,“ нагласи Христоски.
Според партиското соопштение, заложбата на кандидатот е фокусирана на континуитет, а не на прекин на започнати процеси. „Да го продолжиме развојот, да ја зајакнеме општината и да обезбедиме подобар живот за секој жител на Крушево“ – со оваа порака Христоски ја затвори средбата, најавувајќи нов циклус на вложувања во сите населени места во општината.
